ShareThis
Tumutok ang malaking bahagi ng populasyon ng buong mundo sa FIFA World Cup sa Brazil. Pero hindi ito masyadong napansin ng mga Pinoy. Hindi kasi nakapasok sa laban sa world cup ang koponan sa saker ng Pilipinas na Azkals. Mas tumuon pa ang maraming Pinoy sa laban sa kampeyonato ng San Antonio Spurs at Miami Heat sa National Basketball Association (NBA). Basketbol ang itinuturing na pinakapopular na team sport sa Pilipinas. Hanggang ngayo’y nangunguna sa timog-silangang Asya ang pambansang koponan sa basketbol ng Pilipinas – tinawag na Gilas Pilipinas – at kabilang sa limang nangunguna sa buong Asya. Hindi kataka-taka ang kahusayan sa basketbol ng mga Pinoy. Nilalaro ito kahit saan. Kahit sa tabi lang ng kalsada. Kadalasan ay half-court lang. Maraming liga ng basketbol sa mga barangay na half court lang pero ayos pa rin. Kung gagawa ng sarbey sa buong kapuluan, baka maitala sa Guiness Book of World Records ang Pilipinas sa pagkakaroon ng pinakamaraming half court ng basketbol sa buong mundo. Pero balik tayo sa FIFA. Obviously, impluwensiya lang naman ng pananakop sa atin ng US ang pagkarahuyo sa basketbol na ipinasadya para sa lahing matatangkad gaya ng mga Amerikano. Ang bulto ng maliliit at dukhang mga bansa sa Asya, Aprika, at Timog Amerika ay puro mahihilig sa saker imbis na sa basketbol. Ang saker ang isport ng mga bansang nasa 3rd world. Ito ang uri ng isport na madalas kung alin pa ang maliliit at mahihirap na bansa ay mas bigatin ang koponan kumpara sa US at ibang malalaki at mauunlad. Mas kilala ng mga nasa bakwit center sa Palestina, sa mga disyerto ng Iraq, sa mga bulubundukin ng Colombia at Peru, sa mga gubat ng Honduras at Ghana sina Pele at Maradona kesa kina Michael Jordan at Magic Johnson. Mga Pinoy lang talaga ang naiba ang takbo ng utak, na nakatutok sa NBA at may PBA na poor clone ng NBA. Maaaring hindi nasayang ang hilig natin sa basketbol dahil kuwalipikado sa world cup ng basketbol ang Gilas Pilipinas. Ang tiyak, di hamak na mas kaunti ang bilang ng mga lahi sa mundo na susubaybay sa world cup ng basketbol kumpara sa world cup ng saker. Sumisikat na (uli) ang larong saker sa Pilipinas. Marami na ring mga fan ang Azkals, sumusubaybay sa mga laban nito, at pinupursigi na rin ang larong saker bilang isport na mapagpipilian sa athletics at physical education (PE) sa mga hayskul at kolehiyo. Interesado na tayong totohanang makipagtunggalian sa mga kumpetisyon sa saker na pinaghaharian ng mga bansang ‘less privileged’ sa mundo at nasa hany ng mga developing na gaya ng Pilipinas. Paris sa basketbol, maaabot lang ng mga Pinoy ang buong potensiyal sa saker kung lalaganap ang paglalaro nito sa buong kapuluan, sa mga lungsod man o nayon. Kailangang magkaroon ng bigtaym na soccer league sa Pilipinas para magkaroon ng regular na laban sa propesyunal na antas ang mga manlalaro ng saker. Sa grassroot level, maaari nating gamitin ang half-court mentality natin sa basketbol. Di kailangang magkaroon ng full size na soccer field para makapaglaro nito ang kabataan. Kahit kalahati lang. Ang kalahati ng soccer field ay humigit-kumulang lang sa sukat ng sampung full court ng basketbol.
Pantay-Pantay ang mga Lahi
Nagwakas ang laban para sa Kopa ng Sangkatauhan o World Cup ng pandaigdigang pederasyon sa putbol/saker o FIFA sa pagwawagi ng Alemanya sa Arhentina sa laban sa pagkakampeyonato. Mahigpit ang laban. Sa laban, hindi salik ang langit-at-lupa sa pagitan ng ekonomiya, pinansiya, teknolohiya, industriyalisasyon, at pangkalahatang istatus sa pandaigdigang kumunidad ng dalawang bayan. Patibayan sa resistensiya, palakasang sumipa, pahusayan sa kasanayan, at pagalingan sa teamwork ang tanging naging sukatan. Nasaksihan ang anyo ng pagkakapantay-pantay sa pagitan ng mga estado at lahi sa loob ng isang arena. Nagwagi ang mga Aleman hindi dahil mas asensado ang bayang ito kundi dahil sa indibidwal na disiplina at determinasyon ng bawat manlalaro nito, ispiritu ng pagkakaisa ng koponan at – laging kasali sa isport – kaunting suwerte.
Masugid na sinuportahan ng kumpanyang Google ang FIFA World Cup. May regular na apdeyt sa World Cup ang websayt nito sa araw-araw sa kabuuang panahon ng torneyo. Tiyak na araw-araw na nakita ang Google update ng bilyong internet user sa buong mundo na regular na gumagamit ng Google. Nasubaybayan ang mga bansang naglaban kada araw. Hindi indikasyon ito ng pagkilala ng Google sa pagiging mainstream ng larong saker. Matagal nang mainstream ang saker. Para sa kumpanya ng Google, ang isinagawa nitong regular na apdeyt sa mga nagaganap sa FIFA World Cup ay isang hakbang na kunektado sa layuning magkamit-tubo pagkat batid nito ang merkado ng mga tagasubaybay ng nasabing world cup.
Nabanggit natin ang madalas ay kaawa-awang kalagayan ng maraming Pinoy sa paglalaro sa paboritong larong pangkoponan, ang basketbol. Na karaniwang kalahating palaruan o half-court lang ang pinaglalaruan. Kung palaruan lang ng basketbol ay di sapat, paano pa kaya kung soccer field na dalawampung doble ang laki sa isang full court ng basketbol? Nabanggit na ring ang saker ang preferred sport ng mga bayang terdworld o debeloping. Sa isport na ito nakakayang tumapat o mamayani ng mga bayang maliliit at mas atrasado sa mga higante at superpower. Nakapaloob na ba sa kaluluwa ng ating mga pambansang palisi at opisyal na hakbang na ang pamumuhunan sa mga isport ay gaya rin ng edukasyon na para sa kapakanan ng kabataan? Malawak na edukasyon para sa matalas na isip, iba’t ibang isport para sa malakas na pangangatawan ng papalit na salinlahi sa bayan. Walang bayan na napakaliit o napakahirap para hindi makapaglaan ng sapat na espasyo para sa pagtatayo o paghahawan ng lupa na gagawing soccer field. Sa mga lider ng bansa na may malalim na pang-unawa at may bisyon, mas kakailanganin ng kabataan ang malawak na lugar na ang kanilang pangangatawan ay mapapaunlad at ang kasanayan ay mahahasa kesa sa panibagong shopping mall.
Misyon sa 2018
Dapat maging misyon ng Pilipinas na sa susunod na FIFA World Cup na nakatakda sa 2018 ay magiging partisipante at kumpetitor na ang ating pambansang koponan. Na sa 2018 ang simula sa walang patid na pagiging kalahok natin sa FIFA World Cup. Huwag itong ituring na pangarap lang. Higit sa mangarap ang kaya nating gawin. Kaya nating sumipa patungo sa ating tadhana.